Rwanda National Police

Mu nama yahuje ba  CPCs 132 bakorera mu murenge wa Mushonyi mu karere ka Rutsiro, ku italiki ya 6 Mata , Polisi y’u Rwanda ikorera muri ako karere yabakanguriye gukomeza ingamba zo kwicungira umutekano bakumira banarwanya ibyaha aho batuye ndetse no kwitabira no gushyigikira ibikorwa bijyanye no kwibuka ku nshuro ya 22 Jenoside yakorewe Abatutsi muri 1994.

Muri iyo nama yabereye mu mudugudu wa Kariba, mu kagari ka Magaba , ushinzwe imikoranire hagati ya Polisi n’abaturage hagamijwe gukumira no kurwanya ibyaha muri ako karere, Inspector of Police (IP) Jerome Nsabuwera aherekejwe n’umunyamabanga nshingwabikorwa w’umurenge wa Mushonyi, Bwana Niyodusenga Jules n’ukuriye urwego rwa Dasso muri uwo murenge ndetse n’abayobozi b’utugari twose tugize uyu murenge,aho bibukijwe ko buri gihe bagomba kureba ushobora kubahungabanyiriza umutekano bakamushyikiriza inzego zibishinzwe.

IP Nsabuwera  yagize ati:”Mufite uruhare rukomeye mu micungire y’umutekano aho mutuye, niyo mpamvu duhora tubibutsa gutangira amakuru ku gihe no gukangurira abaturanyi banyu gutanga amakuru y’icyabahungabanyiriza umutekano, ibi kandi  bigomba kongerwamo imbaraga muri iki gihe cyo kwibuka ku nshuro ya 22 Jenoside yakorewe Abatutsi muri 1994, aho mugomba kwitabira no gushyigikira ibikorwa byose bijyanye no kwibuka kandi mugafatanya n’izindi nzego kurwanya ingengabitekerezo ya Jenoside.”

IP Nsabuwera yabakanguriye kandi gukora kinyamwuga no kuba intangarugero aho batuye kugirango bakomeze kwicungira umutekano bityo bagere ku iterambere rirambye, aha akaba yabasabye gukurikirana no guha ingufu amarondo kuko atuma ibyaha byinshi bikumirwa.

Akaba yaragize ati:”Mugomba kuba intangarugero mu baturanyi banyu, niyo mpamvu mugomba kwirinda ubusinzi, kunywa ibiyobyabwenge n’inzoga z’inkorano n’ibindi bikorwa byahungabanya umutekano, mukitabira umurimo mugatera imbere n’imiryango yanyu ndetse n’Igihugu.”

Mu bindi yabibukije, harimo kujya batanga amakuru y’imiryango ibanye nabi kugirango igirwe inama, ejo ayo makimbirane atazabaviramo gukubita no gukomeretsanya cyangwa kwicana nk’uko hari aho byagiye bigaragara, yabibukije kandi kubahiriza uburenganzira bw’umwana, barinda ko ahohoterwa cyangwa akoreshwa imirimo ivunanye ndetse abana bose bakajyanwa mu ishuri.

Umunyamabanga nshingwabikorwa w’umurenge wa Mushonyi, Bwana Niyodusenga Jules  wari witabiriye iyo nama, yashimiye Polisi inama idashwema guha abaturage, anabasaba gushyira mu bikorwa impanuro bahawe na Polisi y’u Rwanda.