English
Kinyarwanda
Urubyiruko 296 rwo mu karere ka Kicukiro rwibumbiye muri koperative yitwa Rwandan True Hope organisation ugenekereje mu Kinyarwanda ni Umuryango nyarwanda ugamije icyizere cy’ukuri, ruratangaza ko rwafashe iya mbere mu gufatanya na Polisi ndetse n’izindi nzego gukumira ibyaha no kurwanya ubundi bugizi bwa nabi.
Uru rubyiruko rusanzwe rukora imyuga inyuranye irimo ubukanishi bw’ibinyabiziga, gutunganya imisatsi, kwiga indimi z’amahanga, gukora za mudasobwa, amategeko y’umuhanda, kudoda no gutunganya amafilimi, rwabivugiye mu biganiro byabaye tariki ya 8 Mutarama 2014 mu Murenge wa Gikondo, bikaba byaratanzwe n’ishami rishinzwe imikoranire ya Polisi n’abaturage mu gukumira no kurwanya ibyaha mu buryo buzwi ku izina rya community policing.
Urubyiruko rwitabiriye ibyo biganiro rwaganirijwe ku nsanganyamatsiko zitandukanye zirimo uruhare rw’urubyiruko mu gucunga umutekano banakumira ibyaha binyuranye, uruhare rw’urubyiruko mu gutanga amakuru y’ikintu icyo aricyo cyose cyahungabanya umutekano kugira ngo habeho gukumira ndetse bakaba baranaganirijwe ku ruhare rwabo mu kurwanya ibiyobyabwenge.
Uru rubyiruko rukaba rwarasabye ko rwakomeza gukorerwa ubuvugizi butandukanye mu bigo ndetse na za Minisiteri zinyuranye ku buryo bafashwa mu myuga yabo, kuko nk’uko babyivugiye, kwitabira imyuga inyuranye ni kimwe mu bifasha urubyiruko kwiteza imbere no guteza imbere igihugu cyabo. Bakaba bahamagarira bagenzi babo bacyishora mu bikorwa bibi no kunywa ibiyobyabwenge kubireka bakitabira umurimo kuko aribwo bazagira ejo heza habo.
Bakaba bariyemeje ubufatanye mu kurwanya ibyaha n’ubundi bugizi bwa nabi kandi bagakora n’ubuvugizi kubo basize muri ibyo bikorwa bibi kubivamo bakaza kwiga imyuga.
