Rwanda National Police

Ku itariki ya 2 Ukuboza 2014, Polisi y’u Rwanda ikorera mu karere ka Karongi yagiranye inama n’abayobozi barenga 200 barimo ab’inzego z’ibanze, abahagarariye inzego z’abagore, iz’urubyiruko ndetse n’abaganga, baganirizwa ku cyaha cy’icuruzwa ry’abantu no kukirinda n’ihohotera rikorerwa abagore n’abakobwa ndetse banasabwa gutera intambwe mu kubirwanya no kubikumira.
 
Iyi nama yabereye mu murenge wa Tumba, yari yitabiriwe n‘umuyobozi w’akarere ka Karongi wungirije ushinzwe imibereho myiza y’abaturage Mukabarisa Dativa, na Inspector of Police (IP) Jean Baptiste Rutebuka ushinzwe guhuza ibikorwa bya Polisi n’abaturage hagamijwe kurwanya no gukumira ibyaha.
 
Muri iyo nama, Mukabarisa  yashimye uruhare n’umurava Polisi y’u Rwanda igira mu kurwanya no gukumira ibyaha bitandukanye. Yakomeje asobanura ko icuruzwa ry’abantu n’ihohoterwa rikorerwa abagore n’abakobwa ari ibyaha bihangayikishije isi yose by’umwihariko, n’igihugu cy’u Rwanda by’umwihariko.
 
Mukabarisa yaboneyeho umwanya wo gusaba abayobozi bari bitabiriye iyi nama kugira uruhare mu kurwanya no gukumira ibyo byaha, bahanahana amakuru n’inzego z’umutekano kandi byihuse y’icyahungabanya umutekano w’aho batuye.
 
 IP Rutebuka yasobanuriye abari muri iyi nama ko igitera ubucuruzi bw’abantu ahanini ari iterambere mu itumanaho, kuko umuntu uri mu gihugu runaka muvugana ku buryo bworoshye, uburyo bwo kugera mu bindi bihugu bworoshye, ndetse n’ubujiji.
Kuri iyi ngingo akaba yagize ati:”Abantu baraza bagashuka abana cyane cyane ab’abakobwa, bababeshya ko bagiye kubashakira akazi keza cyangwa amashuri mu bihugu by’amahanga, wagenda ukisanga ibyo bagusezeranyije ataribyo urimo, ahubwo warashowe mu buraya cyangwa ukoreshwa imirimo y’agahato bikaba byakuviramo urupfu”.
Yabasabye kandi kumenyesha inzego z’umutekano igihe cyose hari abantu baketseho kuba bacura umugambi wo gucuruza abantu kugira ngo imigambi y’abo banyabyaha iburizwemo.
 
IP Rutebuka yasabye abari bateraniye muri iyi nama gufasha gushishikariza abo bayobora gutinyuka bagatanga amakuru ajyanye n’ihohotera rikorerwa mu ngo, anababwira ko ibyaha bijyanye n’ihohotera bifitanye isano n’ikoreshwa ry’ibiyobyabwenge birimo urumogi, kanyanga, inzoga z’inkorano  n’ibindi.