English
Kinyarwanda
Binyuze mu makuru Polisi y’u Rwanda yatangaje ku rubuga rwayo arirwo: www.police.gov. rw, abaturarwanda bamenye ibikorwa bitandukanye byabyo byo mu cyumweru gishize.
Nk’uko biri mu ntego zayo, ayo makuru yari agamije gukangurira abaturarwanda kwirinda ibyaha no kugira uruhare mu kubirwanya no kubikumira hagamijwe gukomeza kubungabunga no gusigasira umutekano w’abo n’ibyabo.
U Rwanda na Polisi Mpuzamahanga byafatiye hamwe ingamba zo gufata abakekwaho kugira uruhare muri Jenoside yakorewe Abatutsi
Ishami ry’Ubushinjacyaha bukuru bw’u Rwanda rishinzwe gukurikirana abakekwaho kugira uruhare muri Jenoside yakorewe Abatutsi mu 1994, Polisi Mpuzamahanga, icyicaro cyayo gikuru i Lyon mu Bufaransa n’ ishami ryaryo mu Rwanda, byafatiye hamwe ingamba z’ukuntu byarushaho gufatanya mu gufata abakekwaho kugira uruhare muri Jenoside yakorewe Abatutsi mu 1994 . Kanda hano usome ibindi.
Polisi y’u Rwanda yashyikirije umunyakanada ibikoresho yari yibwe
Ku itariki 15 Nzeli 2015, Polisi y’u Rwanda yashyikirije Brian Thomson, Umunyakanada, akaba n’Umuvugabutumwa ibintu bye yari yibwe aribyo urupapuro rw’inzira n’imashibi ye ya mudasobwa ya IPAD. Kanda hano usome ibindi.
Abapolisi b’u Rwanda bari muri Centrafrika mu butumwa bw’amahoro bambitswe imidari y’ishimwe
Uhagarariye Umunyabanga Mukuru w’Umuryango w’Abibumbye mu gihugu cya Centrafrika, Onanga Anyanga, ku itariki 13 Nzeri 2015, yambitse imidari y’ishimwe abapolisi b’u Rwanda 164 bari mu butumwa bwo kugarura amahoro no kubungabunga umutekano muri iki gihugu kubera imyitwarire myiza n’ubunyamwuga byabaranze mu mirimo bashinzwe. Kanda hano usome ibindi.
Police FC yatangiye shampiyona itsinda ikipe ya Mukura VS
Rutahizamu wa Police FC Isaie Songa na Imran Nshimiyimana ukina hagati bafashije ikipe ya Police FC gutsinda Mukura VS ibitego bibiri kuri kimwe. Uyu mukino wo ku munsi mbere wa shampiyona ukaba warabereye kuri sitade ya Muhanga tariki ya 18 Nzeri 2015. Kanda hano usome ibindi.
Musanze: Abaturage bakanguriwe kwirinda agakoko gatera SIDA, ibiyobyabwenge no kurwanya ihohoterwa
Ku itariki ya 13 Nzeri 2015, kuri sitade Ubworoherane yo mu murenge wa Muhoza mu karere ka Musanze, hatangirijwe ubukangurambaga mu Ntara y’Amajyaruguru bugamije kwirinda agakoko gatera SIDA, ibiyobyabwenge no kurwanya ihohoterwa. Ubu bukangurambaga bukaba butangwa na Polisi y’u Rwanda ibinyujije mu ishami ryayo rishinzwe ubuvuzi. Kanda hano usome ibindi.
Centrafrika: Abapolisi b’u Rwanda basuwe n'umujyanama mu muryango w'Abibumbye abashimira kuba bakora neza
Umujyanama mu bya gipolisi wo mu muryango w’Abibumbye (UN), Komiseri Stephen Feller, ku tariki ya 11 Nzeri 2015 yasuye itsinda ryabapolisi b’u Rwanda (RWA-FPU 1 CAR) bari mu butumwa bwo kubungabunga amahoro mu gihugu cya Centrafrika maze abashimira ubunyamwuga mu mirimo bashinzwe. Kanda hano usome ibindi.
Kayonza: Abakekwaho ubujura bw'ibikoresho by'ikoranabuhanga bafashwe na Polisi y'u Rwanda
Ku wa kane tariki ya 17 Nzeri 2015, Polisi y’u Rwanda mu Ntara y’i Burasirazuba yeretse itangazamakuru abasore batanu bashinjwa ubufatanyacyaha mu bujura bw’ibikoresho by’ikoranabuhanga bitandukanye. Kanda hano usome ibindi.
Nyagatare: Abafatanyabikorwa mu kurwanya no gukumira ibyaha biyemeje kongera imbaraga mubyo bashinzwe
Abafatanyabikorwa ba Polisi y’u Rwanda mu kurwanya no gukumira ibyaha mu karere ka Nyagatare, ku itariki ya 15 Nzeri 2015, bagiranye ibiganiro n’itsinda ryari riyobowe na Senior Superintendent of Police (SSP) Teddy Ruyenzi ,ushinzwe inyigisho n’amahugurwa mu Ishami rya Polisi y’u Rwanda rishinzwe imikoranire hagati ya Polisi y’u Rwanda n’abaturage hagamijwe kurwanya no gukumira ibyaha, maze biyemeza kongera imbaraga mubyo bashinzwe kugira ngo bakomeze kugira uruhare mu kubungabunga umutekano. Kanda hano usome ibindi.
Kayonza: Polisi yataye muri yombi umugabo ukekwaho kwiba imifuka 33 y’inyongeramusaruro
Ku itariki 15 Nzeli 2015, Polisi y’u Rwanda mu karere ka Kayonza yataye muri yombi umugabo witwa Ndahimana Desiré w’imyaka 34 y’amavuko, utuye mu murenge wa Mukarange wo muri aka karere, nyuma yo kumufatana mu nzu ye imifuka 33 y’inyongeramusaruro yari yarahawe amakoperative y’ubuhinzi muri gahunda yashyizweho na Minisiteri y’Ubuhinzi.
Rubavu: Umumotari yahaye Polisi y’u Rwanda amakuru yatumye ifatana abagabo babiri moto bari bibye
Umumotari ukorera mu mujyi wa Rubavu, ku itariki 15 Nzeri 2015, yahaye Polisi y’u Rwanda mu karere ka Rubavu amakuru yatumye ifatana Ndihariyimana Habibu na Sibomana Felicien moto ifite nomero za purake RD 743E bari bibye Shyirambere Innocent. Kanda hano usome ibindi.
Huye: Abaturage bakanguriwe kurengera ibidukikije no kurwanya ibyaha muri rusange
Polisi y’u Rwanda iributsa abaturarwanda ko n’ubwo bafite uburenganzira bwo gutema amashyamba hakurikijwe amategeko no kubaza ibintu bitandukanye mu biti, bakwiye kubikora barengera ibidukikije.
Ubu butumwa bwatanzwe ku wa kane tariki ya 18 Nzeli 2015, mu kagari ka Gahororo, Umurenge wa Karama ho mu karere ka Huye, ahakomereje ubukangurambaga Polisi y’u Rwanda imaze igihe igeza ku baturage mu gihugu hose hagamijwe kurengera ibidukikije. Kanda hano usome ibindi.
Bugesera: Abanyeshuri bigishijwe amategeko y’umuhanda
Ubukangurambaga bwahariwe kwigisha abantu batandukanye kubahiriza amategeko y’umuhanda muri uyu mwaka wa 2015, bwakomereje mu karere ka Bugesera ku tariki ya 16 Nzeri 2015 aho Polisi y’u Rwanda muri aka karere yagiranye ibiganiro n’abanyeshuri 700 bo mu Rwunge rw’amashuri rwa Nyamata Gaturika hamwe n’abarimu babo ndetse n’abayobozi b’inzego z’ibanze ku kubahiriza amategeko y’umuhanda. Kanda hano usome ibindi.
Polisi y’u Rwanda irasaba abantu gukora ubucuruzi ku buryo bwemewe n'amategeko
Abakora ubucuruzi barasabwa na Polisi y’u Rwanda kubahiriza amategeko agenga ibyo bakora birinda magendu n’indi mikorere cyangwa imigirire binyuranyije n’amategeko, bakaba bibutswa ko bidindiza iterambere ry’igihugu. Kanda hano usome ibindi.
Gasabo: Babiri bakurikiranyweho kwiba imodoka undi akaba akurikiranyweho kugura ibyuma byayo
Karangwa Janvier na Ndereyimana Sudi bafungiwe kuri sitasiyo ya Polisi y’u Rwanda ya Remera aho bakurikiranyweho kwiba imodoka yo mu bwoko bwa T/ Hilux ifite nomero za purake RAA 944M y’uwitwa Harindintwari Landouard, naho undi witwa Minani Emmanuel akaba ahafungiwe kubera kugura ibyo byuma. Karangwa Janvier na Ndereyimana Sudi bafungiwe kuri sitasiyo ya Polisi y’u Rwanda ya Remera aho bakurikiranyweho kwiba imodoka yo mu bwoko bwa T/ Hilux ifite nomero za purake RAA 944M y’uwitwa Harindintwari Landouard, naho undi witwa Minani Emmanuel akaba ahafungiwe kubera kugura ibyo byuma. Kanda hano usome ibindi.
