English
Kinyarwanda
Abapolisi 47 bashinzwe gukumira no kurwanya ihohoterwa rishingiye ku gitsina baturutse hirya no hino mu gihugu kuri icyi cyumweru tariki ya 25 Gicurasi basoje amahugurwa bari bamazemo iminsi itanu yaberaga ku Kacyiru muri croix - rouge akaba yari agamije kubongerera ubumenyi mu bijyanye no kurwanya ihohoterwa rishingiye ku gitsina, no kugirango babashe gubitahura ibyaha n’uburyo bakwakira uwahohotewe.
Abasoje amahugurwa bakaba barahawe amasomo ajyanye n’ uruhare rw’ubufatanye bwa Polisi n’abaturage hagamijwe gukumira no kurwanya ibyaha (community Policing) mu kubikumira, gukumira ihohoterwa rishingiye ku gitsina n’uko bakira uwarikorewe, uruhare rw’abapolisikazi mu butumwa bwo kubungabunga amahoro, imikorere ya Isange one Stop Centre, uburyo bwo kuringaniza imbyaro, Kwirinda virus itera Sida ndetse n’imicungire y’abakozi.
Inspector Jean d’arc Mukandahiro wari uhagarariye abahuguwe, ya shimiye Polisi yateguye amahugurwa, maze avuga ko aya mahugurwa abasigiye byinshi kuko bamenyeyemo uburyo bakwirinda inkongi z’imiriro, ubumenyi bwo kurwanya no gukumira ibyaha bitandukanye cyane cyane ihohoterwa rikorerwa mungo ndetse n’imyitwarire y’umupolisi mu kazi.
Asoza ku mugaragaro ayo mahugurwa, umuyobozi ushinzwe abakozi muri Polisi y’u Rwanda Chief Superintendent Vincent Sano yashimiye abitabiriye mahugurwa, abasaba kuzashyira mubikorwa ibyo bize barushaho kunoza umurimo.
Yavuze ko amahugurwa ari ingirakamaro, kuko yongerera ubumenyi abayakoze abasaba kujyana ubwo bumenyi aho bagiye bakazigisha abandi uburyo bakumira ibyaha, kurwanya ihohoterwa no kumenya uburyo bakira uwakorewe icyaha cy’ihohoterwa.
