English
Kinyarwanda
Aya ni yo makuru y'ingezi Polisi y'u Rwanda yatangaje mu cyumweru gishize ku rubuga rwayo rwa murandasi, ari rwo: www.police.gov.rw:
Abapolisi b’abanyarwanda muri Haiti bambitswe imidari y’ishimwe
Abapolisi b’u Rwanda 27, bari mu butumwa bwa Loni bwo kubungabunga no kugarura amahoro mu gihugu cya Haiti, tariki ya 9 Gashyantare, bambitswe imidari yo kubashimira uruhare rwabo rw’indashyikirwa mu kubungabunga amahoro muri iki gihugu.
Umuhango wo kwambika imidari aba bapolisi wabereye mu murwa mukuru wa Haiti wa Port Au Prince. Inkuru irambuye.
Abadepite bo muri Malawi basuye Isange One Stop Center
Itsinda ry’Abadepite bavuye mu gihugu cya Malawi baje kwigira kuri Polisi y’u Rwanda ku buryo yita ku bakorewe ihohoterwa rishingiye ku gitsina hano mu gihugu.
Cecilia Emily B.Chazama, wari uyoboye iri tsinda, yavuze ko batangajwe n’ukuntu Polisi y’u Rwanda, biciye mu kigo basuye, yashoboye gushyiraho uburyo buboneye bwo kwita ku bakorewe ihohoterwa. Inkuru irambuye.
Rubavu: Abakora umwuga wo gutwara abagenzi ku magare bashyizeho amahuriro 17 yo gukumira ibyaha
Abakora umwuga wo gutwara abagenzi ku magare bagera ku 1500 bakorera mu mirenge ya Kanama, Nyakiriba, Kanzenze, Mudende, Bugeshi, na Busasamana, yo mu karere ka Rubavu, ku itariki 10 Gashyantare, bashyizeho amahuriro 17 yo gukumira ibyaha (Anti-Crime Clubs). Inkuru irambuye.
Polisi y’u Rwanda yasubije ubuyobozi bw’u Bwongereza imodoka yibiwe muri icyo gihugu
Ku itariki 8 Gashyantare, Polisi y’u Rwanda yashyikirije ubuyobozi bw’igihugu cy’Ubwongereza imodoka yo mu bwoko bwa Range Rover V8 yari yibwe muri iki gihugu ikaza gufatirwa mu Rwanda.
Assistant Commissioner of Police (ACP) Tony Kuramba, Umuyobozi w’ibijyanye na Polisi Mpuzamahanga n’ubutwererane muri Polisi y’u Rwanda, ni we watanze iyi modoka iherekejwe n’impapuro ziyiranga, abishyikiriza David Ward, impuguke mu by’iperereza ikora mu kigo cyitwa UK National Crime Agency kiri muri Kenya. Inkuru irambuye.
Huye: Polisi y’u Rwanda iributsa akamaro ko kurara mu nzitiramibu
Umuyobozi wa Polisi y’u Rwanda mu karere ka Huye, Chief Superintendent of Police (CSP) Francis Muheto, yasabye abaturage kwirinda malariya bazirikana kuryama mu nzitiramibu iteye umuti.
Ubu butumwa, CSP Muheto yabutanze mu mpera z’iki cyumweru mu kiganiro yatangiye kuri radiyo y’abaturage y’akarere ka Huye. Inkuru irambuye.
Gicumbi: Abiga muri kaminuza b’abakorerabushake mu kwicungira umutekano biyemeje kurushaho gukumira ibyaha
Abanyeshuri 38 b’abakorerabushake mu kwicungira umutekano (Rwandan Youth Volunteers in Community Policing-RYVCP) biga muri Kaminuza y’ikoranabunga n’ubugeni ya Byumba (University of Technology and Arts of Byumba-UTAB) iherereye mu karere ka Gicumbi, biyemeje kunoza gahunda zabo zigamije gukangurira abandi kwirinda ibyaha. Inkuru irambuye.
Kamonyi: Abanyeshuri b’ishuri ribanza rya Gihinga bigishijwe uburyo bwo kugenda mu muhanda
Polisi y’u Rwanda mu karere ka Kamonyi yigishije uburyo bwo kugenda mu muhanda abanyeshuri bagera kuri 300 biga mu ishuri ribanza rya Gihinga riherereye mu kagari ka Gihinga, mu murenge wa Gacurabwenge.
Babyigishijwe na Inspector of Police (IP) Athanase Niyonagira, akaba ashinzwe imikoranire ya Polisi y’u Rwanda n’abaturage ndetse n’izindi nzego hagamijwe ubufatanye mu kwicungira umutekano mu karere ka Kamonyi. Inkuru irambuye.
Abamotari bo muri Rubavu na Burera bakanguriwe kwirinda no kurwanya ibyaha
Polisi y’u Rwanda mu karere ka Rubavu na Burera, ku itariki 11 Gashyantare, yagiranye inama n’abakora umwuga wo gutwara abagenzi kuri moto, ibasaba gukorana neza n’inzego z’umutekano hagamijwe ubufatanye mu kurwanya no gukumira ibyaha. Inkuru irambuye.
Nyagatare : Barishimira umusaruro w’ubukangurambaga mu kurwanya ibiyobyabwenge
Ubukangurambaga burwanya itundwa, icuruzwa n’ikoreshwa ry’ibiyobyabwenge mu karere ka Nyagatare, bwatumye hafatwa ibinyobwa bitemewe birimo amakarito 500 ya Chief Warage na litiro 650 za kanyanga.
Umuyobozi wa Polisi mu karere ka Nyagatare, Senior Superintendent of Police (SSP) Christian Safari yavuze ko ibi biyobyabwenge bifite agaciro ka miliyoni 9 n’ibihumbi 200 (9,200,000) by’amafranga y’u Rwanda, bikaba byarafashwe ku bikorwa by’isaka byabaye mu mezi abiri ashize, nyuma y’amakuru yatanzwe n’abaturage. Inkuru irambuye.
Police FC yatangiye neza urugamba rwo guhatanira igikombe nyafurika
Police FC yatangiye umukino wa mbere mu marushanwa nyafurika (CAF Confederation Cup), itsinda Athalabal yo muri Sudani y’Epfo ibitego 3-1. Inkuru irambuye.
