Rwanda National Police

Abapolisi 21 baturutse mu bihugu bya Ethiopia Burundi n’u Rwanda, kuri uyu wa kane tariki ya 3 Nyakanga, basoje amahugurwa bari bamazemo ukwezi, akaba yaragenewe abapolisi bazahugura abandi mu bihugu byabo baba bagiye kujya mu butumwa bw’amahoro bw’umuryango w’abibumbye mu bihugu bitandukanye.

Aya mahugurwa yaberaga mu kigo gihugura abapolisi bagiye kujya mu butumwa bw’amahoro bw’umuryango w’abibumbye kiri i Gishari mu karere ka Rwamagana.

Akaba yarateguwe na Polisi y’u Rwanda, ibifashijwemo n’umutwe w’inkeragutabara muri Afurika y’Iburasirazuba (EASF-COM).

Asoza aya mahugurwa ku mugaragaro, umuyobozi mukuru wa Polisi wungirije ushinzwe imiyoborere n’abakozi (DIGP) Juvenal Marizamunda, yabwiye abarangije amahugurwa ko yashyiriweho kugirango umutwe w’inkeragutabara muri Afurika y’Iburasirazuba(EASF) ubashe kugera ku ntego zawo mbere y’uko umwaka wa 2014 urangira.

DIGP Marizamunda yakomeje agira ati:”Nizeye ko ubumenyi mukuye hano buzabafasha kwigisha bagenzi banyu mwasize mu bihugu byanyu, kandi tugomba guhuriza imbaraga hamwe tugamije gutuma umutwe w’inkeragutabara muri Afurika y’Iburasirazuba (EASF)ugera ku ntego zawo. Turizera ko iyi mikoranire hagati ya Polisi zacu izatuma dutera imbere kandi duhanahana ubunararibonye”.

Yasoje avuga ko amahugurwa nk’aya atyaza ubwenge bw’abapolisi bakagaragaza ubuhanga aho boherejwe hose mu butumwa bwo kubungabunga amahoro mu bihugu birangwamo amakimbirane.

Uwari uhagarariye umutwe w’inkeragutabara muri Afurika y’Iburasirazuba (EASF-COM), Brigadier General Tai Gituai, yashimiye u Rwanda na Polisi y’u Rwanda by’umwihariko, kuko bemeye kwakira aya mahugurwa, n’uruhare bagira mu kugarura amahoro mu bihugu bitandukanye birimo amakimbirane.

Yakomeje avuga ko gushyiraho amahugurwa nk’aya ari ukugirango abayahabwa babashe gukora akazi kabo neza bubahiriza amahoro kandi bagarura umutekano mu bihugu bakoreramo.

Uwavuze mu izina ry’abarangije amahugurwa Commander Gezahegn Kabthyemer,uturuka mu gihugu cya Ethiopia, yavuze ko bayakuyemo ubumenyi n’ubushobozi bizabafasha gukora akazi kabo neza, byose babikesha ababahuguye.

Commander Gezahegn yongeyeho ko ikigo gihugura abapolisi bagiye kujya mu butumwa bw’amahoro bw’umuryango w’abibumbye cya Gishari ari indashyikirwa mu karere kubera ubuyobozi buhamye gifite, bukora akazi neza kandi bugakurikira buri kintu cyose.

Ikigo gihugura abapolisi bagiye kujya mu butumwa bw’amahoro bw’umuryango w’abibumbye kiri i Gishari cyashinzwe mu 2012, kikaba kimaze guhugura ibyiciro 8 by’abapolisi bajya mu butumwa bw’amahoro, harimo itsinda ry’abapolisi 140 baturutse mu gihugu cy’u Burundi.