Police HC yegukanye igikombe cy'irushanwa ryiswe Rwanda Handball Challenge Trophy

CP Bruce Munyambo ushinzwe amakipe ya Polisi y'u Rwanda niwe washyikirijwe igikombe cya Police HC

Kuva kuri uyu wa Gatandatu tariki ya 29 Gicurasi kugeza tariki ya 30 Gicurasi 2021 amakipe y'umukino w'amaboko(Handball)yarimo guhatanira igikombe cyateguwe n'ishyirahamwe ry'umukino wa Handball mu Rwanda. Ni irushanwa ryiswe Rwanda Handball Federation Challenge Trophy. Mu makipe 8 yari yitabiriye iri rushanwa, ikipe ya Polisi y'u Rwanda, Police Handball Club niyo yegukanye igikombe nyuma yo gutsinda APR HC ku mukino wa nyuma, yayitsinze ibitego 33 kuri 24.

Police HC yari mu itsinda A ririmo amakipe 4 ariyo Police HC, Gorillas, UR-Rukara,na UR-Rwamagana. Ni mugihe itsinda B ryarimo APR HC, Nyakabanda, UR-Huye na UR-Remera. Ikipe ya Police HC yashoboye gutsinda amakipe yose bari mu itsinda rimwe igera muri kimwe cya kabiri cy’irushanwa itsinda ikipe ya Nyakabanda HC ibitego 30 kuri 05 ku mukino wa nyuma(Final) Police HC itsinda APR HC ibitego 33 kuri 24.

Nyuma y’umukino umutoza w’ikipe ya Police HC, Inspector of Police(IP) Antoine Ntabanganyimana  yashimiye abakinnyi abereye umutoza ariko cyane cyane ashimira ubuyobozi bwa Polisi y’u Rwanda butahwemye kuba hafi y’amakipe  n’ubwo bitari ibihe byoroshye by’icyorezo cya COVID-19.

Ati” Nyuma y'uko imikino ihagaritswe kubera icyorezo cya COVID-19, Turashima ubuyobozi bwa Polisi y’u Rwanda bwakoze uko bushoboye amakipe agasubukura imikino yayo yose harimo n'ikipe ya Police Handball yatwaye igikombe none. Turashima ubwitange bwabakinnyi n’abatoza dufatanya bakoze akazi kabo neza bagahesha ishema Polisi y’u Rwanda.”

IP Ntabanganyimana yakomeje asezeranya ubuyobozi bwa Polisi y’u Rwanda ndetse n’abakunzi b’ikipe ya Police HC ko batazatezuka ku muhigo wo gutwara ibikombe ashimangira ko Police HC izaharanira guhora  ku isonga.

Ikipe ya Police HC yahereye mu itsinda yarimo itsinda amakipe bari bahanganiye igikombe.

Ubwo ikipe ya Police HC yashyikirizwaga igikombe hari, Commissioner of Police(CP) Bruce Munyambo, umuyobozi w’ishami rya Polisi rishinzwe guhuza ibikorwa bya Polisi n’abaturage akaba ari nawe ushinzwe amakipe ya Polisi y’u Rwanda. CP Munyambo ni nawe washyikirijwe igikombe.

Iri ni irushanwa rya mbere ribaye mu mukino wa Handball kuva icyorezo cya COVID-19 cyagera mu Rwanda muri Werurwe 2020. 

Tariki ya 29 Mata 2021,Umuyobozi wungirije muri Polisi y’u Rwanda ushinzwe ubutegetsi  n’imari , DIGP/AF  Jeanne Chantal Ujeneza yamurikiwe ibikombe 10 by’amakipe ya Polisi y’u Rwanda.  Ni ibikombe  amakipe ya Polisi yegukanye mu marushanwa yo mu mwaka wa 2019-2020,muri ibyo 10 bikombe harimo 5 byatwawe n’ikipe  ya Handball(Police HC).


<-Back To RNP News