Police HC yegukanye igikombe cy’irushanwa ryo kwibuka abazize Jenoside yakorewe abatutsi mu 1994

Ikipe ya Polisi y’u Rwanda ikina umukino w’amaboko wa Handball, Police Handball Club kuri iki cyumweru tariki ya 20 Kamena yegukanye igikombe cy’irushwanwa ryo kwibuka abazize Jenoside yakorewe abatutsi mu 1994. Ni igikombe yatwaye nyuma yo gutsinda ikipe ya E.S Kigoma HC ku mukino wa nyuma iyitsinze ibitego 33 kuri 24.

Iri rushanwa ryatangiye tariki ya 19 Kamena, ribera kuri sitade amahoro rihuza amakipe 13 yose ya hano mu Rwanda. Police HC yari mu itsinda  A aho yari kumwe na UR-Huye na UR-Gikondo. Mu mikino y’amajonjora yabaye tariki ya 19 Kamena Police HC yatsinze UR-Gikondo ibitego 31 kuri 5, Itsinda UR-Huye ibitego 25 kuri 11 hanyuma  ku mukino wo muri ¼ Police HC itsinda UR-Rusizi ibitego 27kuri 15.

Bukeye tariki ya 20 Kamena nibwo hakinwe imikino ya ½ aho Police HC yakinnye na Gorillas HC umukino urangira Police HC iyitsinze ibitego 44 kuri 35. Ku mukino wa Nyuma(Final) Police HC yahuye na E.S  Kigoma HC iyitsinda ibitego 33 kuri 24, iyi E.S Kigoma ikaba yari yatsinze APR HC muri ½ mu gihe byari bimenyerewe ko Police HC na APR HC zisanzwe zihurira ku mukino wa nyuma mu marushanwa atandukanye y’imbere mu gihugu.

Abakinnyi nk’umunyezamu Bananimana Samuel, ariwe nawe wahawe igikombe cy’umunyezamu mwiza wirushanwa, Tuyishime Zacharie, Nshimiyimana Alexis na Rwamanywa Viateur  b’ikipe ya Police HC barigaragaje cyane muri iri rushanwa aho bagoye cyane amakipe bagiye bahura.

Umutoza wa Police HC ashyikiriza igikombe CP Bruce Munyambo nk'ushinzwe amakipe ya Polisi y'u Rwanda

Umutoza mukuru wa Police HC, Inspector of Police(IP) Antoine Ntabanganyimana yashimiye abakinnyi abereye umutoza, ashimira ubuyobozi bwa Polisi y’u Rwanda ndetse anashimira abakunzi b’ikipe uburyo bayibaye hafi mu marushanwa bamazemo iminsi.Ati” Tariki ya 30 z’ukwezi gushize twari twatwaye igikombe cy'irushanwa ryiswe Rwanda Handball Challenge Trophy. Ubu dutwaye iki gikombe cy’irushanwa ryo kwibuka abazize Jenoside yakorewe abatutsi, byose bituruka ku ishyaka n’umurava biranga abakinnyi kandi ubuyobozi bwa Polisi y’u Rwanda buba buri hafi y’ikipe.”Umutoza IP Ntabanganyimana  avuga ko we n’abakinnyi abereye umutoza biteguye gukomeza kwesa imihigo batwara ibikombe iyi ikaba ari intangiriro.Ati” Ibihe turimo by’icyorezo cya COVID-19 tugize amahirwe ntibihagarike amarushanwa nakwizeza abakunzi b’ikipe ya Police HC ko ibikombe bizaba bihatanirwa nta kabuza tuzabyegukana. Iyi ni intangiro, abakinnyi bameze neza kandi twagiye twongeramo amaraso mashya nta kabuza tuzajya twegukana intsinzi.Iki gikombe Police HC yegukanye ni icya 51 kuva yashingwa mu mwaka 2002. Mu mwaka umwe w’imikino mbere y’uko icyorezo cya  COVID-19 kigera mu Rwanda iyi kipe yari yatwaye ibikombe 7. Twabibutsa ko mu mwaka wa 2019 ubwo haherukaga gukinwa irushanwa ryo kwibuka abazize Jenoside yakorewe abatutsi ikipe ya Police HC yari yatsinzwe na APR HC ku mukino wa nyuma.

Umutoza ushinzwe kongerera ingufu abakinnyi n'umuganga wa Police HC bishimira igikombe.


<-Back To RNP News