Police HC na APR HC zizahurira ku mukino wa nyuma w’igikombe cy’Igihugu

Kuva tariki ya 23 na 24 mu Karere ka Gasabo, Umurenge wa Remera kuri sitade amahoro harimo kubera irushanwa ry’igikombe cy’Igihugu. Kuri uyu wa Gatandatu tariki ya 30 Ukwakira ikipe ya Police Handball Club iraranye itike yo gukina umukino wa nyuma w’iri rushanwa.

Police HC ibigezeho nyuma yo gutsina ikipe ya Kaminuza ishami rya Nyarugenge (UR-Nyarugenge) muri kimwe cya kane cy’irangiza (1/4), yayitsinze ibitego 57 ku bitego 9 bya UR-Nyarugenge. Yanatsinze   ishuri ryisumbuye rya ADEGI Gituza, iyi bahuye ku mukino wa kimwe cya kabiri cy’irangiza (1/2), Police HC itsinda ibitego 48 kuri 15.

Biteganijwe ko kuri iki cyumwe tariki ya 31 Ukwakira saa saba z’amanywa  ikipe ya Police HC icakirana n’ikipe ya APR HC ku mukino wa nyuma (Final).Ni umukino w’ishiraniro kuko aya makipe ahora ahangana cyane kandi akenshi ahurira ku mukino wa nyuma.

Umutoza wa Police HC, Inspector of Police (IP) Antoine Ntabanganyimana yashimiye abakinnyi  abereye umutoza ku ishyaka bakomeje kugaragaza muri iri rushanwa. Abasaba kuzitwara neza no ku mukino wa nyuma bazaba bahura na APR HC.

Yagize ati ”Kuva iri rushanwa ryatangira mu mpera z’icyumweru gishize ntabwo abakinnyi banjye bigeze bantenguha. Bitwaye neza kuva mu majonjora kandi naho twahahuriye n’amakipe meza, si ibya none kuko n’ubundi basanganwe  ishyaka n’umurava wo gutsinda. Ikipe ya APR HC tuza guhurira ku mukino wa nyuma kuri iki cyumweru ni ikipe nziza ariko nizeye ko tuzitwara neza tukayitsinda nk’uko bijya bigenda kenshi.”

IP Ntabanganyimana yashimiye ubuyobozi bwa Polisi y’u Rwanda uko bakomeje kuba hafi y’ikipe ikabafasha kwitwara neza. Yanashimiye abafana bakomeza kuba inyuma y’ikipe yabo, yabasezeranije kutazabatenguha.

Muri iri rushanwa Police HC yari mu itsinda rya UR-Rusizi, Bugesera, Gicumbi HBT na Ruhango. Iri rushanwa ry’igikombe cy’Igihugu ryaherukaga mu mwaka wa 2015.Police HC na APR HC zizahurira ku mukino wa nyuma w’igikombe cy’Igihugu


<-Back To RNP News