Mu mukino wo kwishyura Police FC itsinze Musanze FC ibitego 2-1

Kuri uyu wa mbere tariki ya 10 Gicurasi nibwo Police FC yakinnye umukino wo kwishyura wayihuje na Musanze FC, umukino wabereye kuri Stade Amahoro utangira ku isaha ya saa cyenda z’amanywa. Uyu mukino w’ishiraniro warangiye ikipe ya Polisi y’u Rwanda (Police FC) itsinze Musanze FC ibitego bibiri kuri kimwe. Umukino ubanza nanone Police FC yari yatsinze Musanze FC igitego kimwe ku busa mu mukino wari wabereye i Musanze.

Igice cya mbere  cyatangiye bigaragara ko Police FC irusha Musanze FC kuko yagiye isatira cyane izamu ryari ririnzwe na Ndori Jean Claude. Mu  minota 45 y’igice cya mbere abakinnyi ba  Police FC nka Ndayishimiye Antoine Dominique, Nshuti Savio, Iyabivuze Osee na Evode Ntwari bakomeje kotsa igitutu izamu rya Musanze FC bityo ahagana ku munota wa 26 Ndayishimiye Antoine  Dominic atsinda igitego cya mbere ku ruhande rwa Police FC. Abakinnyi ba Police FC bakomeje gushaka igitego cya kabiri biranga kuko Nshuti Savio yahushije ibitego bibiri byari byabazwe, igice cya mbere kirangira  ari igitego kimwe cya Police FC. 

Nyuma y’akaruhuko k’iminota 15 abakinnyi ba Musanze FC bagarutse  bashaka kwishyura igitego bari batsinzwe mu gice cya mbere. Muri iki gice  Musanze FC yigaranzuye Police FC mu buryo bugaragara, ba rutahizamu ba Musanze FC bateye amashoti akomeye Habarurema Gahungu umuzamu wa Police FC  yitwara neza. Ku munota wa  60 uwitwa Niyitegeka Idrissa atsinda igitego cyo kwishyura ku ruhande rwa Musanze FC biba igitego kimwe kuri kimwe.

Umutoza wa Police FC, Haringingo Francis yabonye ko ikipe isumbirijwe akora impinduka yongera amaraso mashya mu ikipe mu gice cy’ubusatirizi. Harerimana Obed umukinnyi usatira izamu anyuze ku ruhande rw’imoso yasimbuye Nshuti Savio Dominic, Mico Justin asimbura Ntwari Evode, Sibomana Patrick Pappy asimbura Iyabivuze Osee. Mu gice cyo kugarira Usengimana Faustin yasimbuye Musa Omar naho Nduwayo Valerie asimbura Twizerimana Martin Fabrice. 

Nyuma y’izi mpinduka abakinnyi nka Harerimana Obed na Sibomana Patrick Pappy bagoye cyane ba myugariro b’ikipe ya Musanze FC,  ku munota wa 82  Ndayishimiye Antoine Dominique yacenze umuzamu Ndoli Jean Claude ahereza umupira Sibomana Patrick Pappy yari ahagaze ahita atsinda igitego cya kabiri ku ruhande rwa Police FC. Umukino wose urangira ari bitego bibiri bya Police FC kuri kimwe cya Musanze FC.  Ibi byatumye Police FC inganya amanota n’ikipe ya AS Kigali kuko zombi mu itsinda C zifite amanota 9.


<-Back To RNP News