Mu marushanwa ngororamubiri amakipe ya Polisi yabaye aya mbere atwara imidali 29 n'igikombe

Kuri iki cyumweru tariki ya 25 Mata amakipe  ngororamubiri  ya Polisi  y’u Rwanda yitabiriye irushanwa ryateguwe n’ishyirahamwe ry’imikino ngororamubiri mu Rwanda.  Ni amarushanwa yakinwaga mu byiciro byo kwiruka, gusimbuka no gutera  umuhunda, gutera  intosho no gutera ingasire. Polisi y’u Rwanda yari ihagarariwe mu byiciro byose ndetse n’abakinnyi bitwara neza baba aba mbere mu byiciro bitandukanye.

Muri iri rushanwa amakipe ya Polisi yegukanye imidali 29 muri rusange,  harimo imidali 14 ya zahabu, 9 ya Feza n’imidali 6 y’umuringa,banahawe igikombe nk'amakipe yabaye aya mbere muri rusange. Umuyobozi w’ishami rya Siporo muri Polisi y’u Rwanda, Inspector of Police(IP) Antoine  Ntabanganyimana yavuze ko muri rusange abakinnyi ba Polisi y’u Rwanda bitwaye neza cyane mu kwiruka kuko ari naho havuye imidali myinshi ya Zahabu.

Ati” Nko mu kiciro cyo kwiruka no gutera umuhunda, gutera intosho no gutera ingasire twahakuye imidali ya zahabu myinshi. Si aho gusa kuko no mu kwiruka dufite abapolisi bagiye baba aba mbere mu kwiruka metero zitandukanye babona imidali.” 

Mu kwiruka metero 100 na metero 200 Police Costable (PC) Nsengiyumva Justin na Nyiraneza Joselyne babaye aba mbere bahabwa imidali ya zahabu. Mu kwiruka metero 800 PC Abayisenga Elysee yabaye uwa mbere abona umudali wa zahabu, mu kwiruka metero 400 inshuro 4(400mx4) hakinaga abakinnyi bane uwitwa SGT Safari Emmanuel, PC  Nzitatira Patrick, PC Giraneza Placide na PC Mutabazi Emmanuel babaye aba mbere batsindira  imidali ya Zahabu. 

Mu kiciro cyo  gusimbuka umurambararo n’urukiramende uwitwa Nshimiyimana Alex yabaye uwa mbere nawe ahembwa  umudali wa zahabu. Mu gutera umuhunda,  Assistant Inspector of Police(AIP) Jean Pierre Cyril  Byiringiro yabaye uwa mbere abona umudali wa zahabu, mu gutera intosho , PC Ntamugabumwe Jean d’Amour yabaye uwa mbere ahembwa umudali wa zahabu ndetse no mu gutera  ingasire yabaye uwa mbere ahembwa umudali wa zahabu.

IP Ntabanganyimana yashimiye abakinnyi uko bitwaye muri iri rushanwa ariko cyane cyane ashimira ubuyobozi bwa Polisi y’u Rwanda bwabaye hafi amakipe akabasha kwitabira irushanwa n’ubwo byari mu bihe bigoye byo guhangana n’icyorezo cya COVID-19.

Ati” Mbere na mbere turashimira ubuyobozi bwa Polisi y’u Rwanda uburyo bahora hafi y’amakipe, iri rushanwa ni irya mbere ishyirahamwe ry’amarushanwa ngororamubiri riteguye kuva iki cyorezo cya COVID-19 kigeze mu Rwanda. Ubuyobozi bwateguye neza abakinnyi, abakinnyi nabo bagerageje kwitwara neza baba aba mbere.”

Iri rushanwa rizwi ku izina rya  Track and Field championship risanzwe riba buri mwaka rigategurwa n’ishyirahamwe nyarwanda ry’amarushanwa ngororamubiri.  Kuri iyi nshuro ryari ryitabiriwe n’amakipe 10 ariyo  Police, APR, Sina Gerard, Kaminuza y’u Rwanda(UR),Nyamasheke,Nyaruguru,Kamonyi,Vision Jeunesse Nouvelle,Rutsiro na Rwamagana.


<-Back To RNP News