Gicumbi: Abantu 17 bafatiwe mu kabari barimo kunywa inzoga barenze ku mabwiriza yo kurwanya COVID-19

Kuri iki cyumweru tariki ya 02 Gicurasi Polisi y’u Rwanda ku bufatanye n’abaturage bafashe abantu 17 bateraniye mu kabari barimo kunywa inzoga, bafatiwe mu Karere ka Gicumbi mu Murenge wa Manyagiro mu Kagari  ka Ryarumba. Bafashwe ahagana  saa munani z’amanywa, bafatirwa mu kabari ka Gatera Anastase w’imyaka 60, ni mugihe nyamara amabwiriza ya Leta avuga ko utubari dukomeza gufunga mu rwego rwo kwirinda ikwirakwira ry’icyorezo cya COVID-19. 

Umuyobozi wa Polisi mu Karere ka Gicumbi, Superintendent of Police (SP) Jean Bosco Minani yavuze ko bariya bantu bose bafatiwe mu cyumba barimo kunywa urwagwa.

Yagize ati” Abaturage batanze amakuru abapolisi bajyayo basanga bikingiraniye mu cyumba begeranye cyane  barimo kunywa urwagwa. Barimo gusangirira mu macupa umwe ahererekanya n’undi barenze ku mabwiriza ya Leta yo kwirinda COVID-19.”

SP Minani yashimiye abaturage batanze amakuru yafashije  inzego z’umutekano gufata bariya bantu, yibutsa abaturage ko buri muntu afite inshingano zo kubahiriza amabwiriza yo kurwanya icyorezo cya COVID-19, akagira uruhare rwo kukirinda no kukirinda abandi. Haramuka hari abo babonye barenze ku mabwiriza bakihutira gutanga amakuru.

Abafashwe bahise bajyanwa ku biro bya sitasiyo ya Polisi ya Cyumba baganirizwa ku bukana bwa COVID-19  n’amabwiriza ajyanye no kwirinda iki cyorezo.


<-Back To RNP News