DIGP Ujeneza yasuye Abapolisi bakorera mu Ntara y'Amajyepfo

Kuri uyu wa Gatanu, tariki ya 22 Mata, Umuyobozi wa Polisi wungirije ushinzwe ubuyobozi n'abakozi, Deputy Inspector General of Police (DIGP) Jeanne Chantal Ujeneza, yatangiye uruzinduko rw'akazi rw'iminsi ibiri akorera mu turere dutandukanye tugize intara y'Amajyepfo, aho yasabye abapolisi kurangwa n’indangagaciro, ikinyabupfura no gukunda akazi.

Ku munsi wa mbere, DIGP Ujeneza, aherekejwe n'umuyobozi wa Polisi mu ntara y'Amajyepfo; Assistant Commissioner of Police (ACP) Claude Tembo yasuye Abapolisi bakorera mu turere twa Ruhango, Nyanza, Huye, na Nyamagabe.

Ubwo yabagezagaho ijambo, DIGP Ujeneza, yabasabye gukunda akazi bakarushaho kugakorana umwete, kugirango bakomeze kubumbatira  ituze n’umutekano urambye, mu kurinda abaturage ndetse n'ibintu byabo.


Yagize ati: " Nk'abapolisi inshingano nyamukuru zacu ni uguharanira ko abaturarwanda batekana kandi bigakorwa kinyamwuga."

DIGP Ujeneza yabibukije ko bagomba guhora barangwa n'ikinyabupfura, indangagaciro, kwakira neza ababagana no gutanga serivise nziza, bakirinda ruswa, ubusinzi, cyangwa kubangamira uburenganzira bwa muntu kuko bishobora guha isura mbi Polisi bikanabangamira umutekano w'igihugu.

Yasoje abasaba gukorana n'abaturage byahafi, bumva ibibazo bafite kandi bakabafasha kubikemura.

Biteganyijwe ko kuri uyu wa Gatandatu tariki ya 23  Mata, DIGP Ujeneza azasura abapolisi bakorera mu turere twa Nyaruguru, Gisagara, Muhanga na Kamonyi.


<-Back To RNP News