Amafoto: Mu mukino w’ishiraniro Police HC itsinze APR HC iyitwara igikombe cy’Igihugu

Abakinnyi ba Police HC bishimiye igikombe cyari kimaze imyaka 6 kidakinirwa

Kuri sitade Amahoro mu Karere ka Gasabo, umurenge wa Remera niho habereye umukino wa nyuma (Final) w’Igikombe cy’Igihugu ndetse ni naho hanabereye iri rushanwa kuva tariki ya 23 na 24 Ukwakira  2021. Uyu munsi  tariki ya 31 Ukwakira umukino watangiye ku isaha ya saa munani, warangiye ikipe ya Police HC itsinze ikipe ya Police HC ibitego 25 kuri 23.

Aya makipe agira abakunzi benshi kandi ni  nayo ahora ahurira ku mukino wa nyuma mu marushanwa yose aba muri uyu mukino w’amaboko (Handball). Ni umukino urangwa n’ishyaka ryinshi haba ku batoza, abakinnyi ndetse n’abakunzi b’aya makipe.

Abakinnyi ba Police HC bagoye cyane aba APR HC bituma babatwara igikombe cy'Igihugu

Umutoza w’ikipe ya Police HC, Inspector of Police (IP) Antoine Ntabanganyimana yavuze ko nk’ibisanzwe umukino wose awufata nk’ukomeye ariko iyo bigeze ku guhura na APR HC biba akarusho kuko aya makipe buri gihe ahuzwa no gushaka iza gutwara igikombe.

Mu kibuga yabanjemo abakinnyi bakomeye ndetse bamaranye igihe kirekire. Twavuga nka Kapiteni w’ikipe, CPL Duteteriwacu Norbert, Umunyezamu Bananimana Samuel ndetse wanagoye cyane ikipe ya APR HC, Muhumure Elysee (umukinnyi mushya), Tuyishime Zacharie, Umuhire Yves (Umukinnyi mushya) Rwamanywa Viateur na  Murwanashyaka Emmanuel bakunze kwita Kabage.

Uko umukino wagenda urushaho gukomera umutoza IP Ntabanganyimana yagendaga akora impinduka mu kibuga azanamo Nshimiyimana Alex, umunyezamu Uwimana Jackson ndetse na PC Siboniyo Philippe.

Umutoza wa Police HC ishyikiriza igikombe Rtd ACP Murenzi Sebakondo  yari yaje gushyigikira ikipe

Igice cya mbere cy’iminota 30 cyarangiye Police HC ifite ibitego 12 ku bitego 9 bya APR HC, ubwo ariko niko mu mukino hagati hanyuragamo umwanya abatoza bagaha amabwiriza abakinnyi. Igice cya Kabiri cyatangiye ikipe ya APR HC yavuguruye imikinire ndetse itangira gutsina Police HC kuko hari aho byageze bakagenda banganya ibitego. Abakinnyi ba Police HC bahitaga bakora ibishoboka byose bakongera bagashyiramo ikinyuranyo cy’ibitego nka Bibiri, iminota 60 y’umukino yaje kurangira ikipe ya Police HC itsinze APR HC ibitego 25 kuri 23.

Umutoza IP Ntabanganyimana yishimiye igikombe atwaye ndetse anashimira abakinnyi be uko bagaragaje ishyaka no kudacogora.

Yagize ati” Dusanzwe tubizi ko APR HC ari ikipe nziza, ni ikipe yiyubaka buri mwaka, ni ikipe ifite abakinnyi bashya ndetse tutari tumenyereye imikinire yabo. Gusa ndashimira abakinnyi mbereye umutoza ko bakurikije inama nabahaye none bakaba bashoboye kwegukana igikombe cy’Igihugu. Ni ibintu byo kwishimira ndetse nshimira n’Imana kuko irushanwa rirangiye nta mukinnyi uvunitse.”

Uturutse ibumoso ni umutoza wungirije, AIP Jean Pierre Cyrile Byiringiro, hagati ni umutoza mukuru, IP Antoine Ntabanganyimana ku ruhande ni muganga w'ikipe S/SGT Mugwiza Philippe

IP Ntabanganyimana yakomeje ashimira ubuyobozi bwa Polisi y’u Rwanda uko bahora hafi y’ikipe bikayitera imbaraga zo kwitwara neza buri mwaka. Yanashimiye abafana bakomeje kuba hafi y’ikipe dore ko no kuri uyu mukino wa nyuma bari baje kuyishyigikira ari benshi.

Umutoza w’ikipe ya APR HC, Bagirishya Anaclet yashimiye mugenze we IP Ntabanganyimana yemera ko byari bikwiye ko ikipe ya Police HC itwara igikombe.

Yagize ati”  Nibyo ntabwo ngaya abakinnyi banjye bakoze uko bashoboye kuko murabibona ko bashoboye kugera ku mukino wa nyuma. Mwabibonye ko bamwe bakiri bato kandi ni bashya, turacyakomeza kubaka ikipe. Police HC ni ikipe nziza namwe mwabibonye, abakinnyi bayo hafi ya bose baraziranye, baramenyeranye kuko bamaranye imyaka igera kuri 6.”

Umutoza wa Police HC, AP Antoine Ntabanganyimana yashimiye abakinnyi, ubuyobozi bwa Polisi y'u Rwanda ndetse n'abafana ba Police HC

Police HC yabaye iya mbere itwara igikombe, APR HC iba iya kabiri naho ikipe y’ishuri ryisumbuye rya Kigoma iba iya Gatatu. Iri rushanwa ryari ryitabiriwe n’amakipe agera kuri 20.

Umutoza ndetse n’abakinnyi b’ikipe ya Police HC nyuma y’umukino bavuze ko iri rushanwa begukanye wari umwanya mwiza wo kwitegura irushanwa ritaganijwe mu gihugu cya Tanzaniya mu mpera z’ Ugushyingo uyu mwaka. Bavuze ko nta kudohoka bagiye gukomeza imyitozo nk’uko bisanzwe.

Umutoza wa APR HC, Bagirishya Anaclet yemeye ko ikipe ya Police HC iri ku rwego rwo gutwara igikombe icyo aricyo cyose

Abakinnyi bashya baherutse kuza muri Police HC bishimira igikombe, Muhumure Elysee na Umuhire Yves

Nyuma yo kwegukana igikombe abakinnyi bateruye mugenzi wabo CPL Mutuyimana Gilbert uherutse kuvunikira mu irushanwa ryiswe Rwanda Handball Challenge Trophy ryabaye muri Gicurasi uyu mwaka


<-Back To RNP News