Polisi yafashe inzererezi, ibiyobyabwenge n’abajura mu mukwabu yakoze mu turere dutandukanye

Kuwa gatanu tariki ya 20 Nzeri, Polisi yakoze umukwabu mu turere dutandukanye maze ifata ibiyobyabwenge binyuranye, inzererezi ndetse n’abajura.  Mu  karere ka Kayonza umurenge wa Mukarange, Polisi ihakorera yafashe  uwitwa Ruteguha Jean Claude w’imyaka 26 y’amavuko nyuma yo kumusangana ibikoresho bitandukanye yari yibye  birimo mudasobwa imwe  na mikorosikopi. Ubu afungiwe kuri sitasiyo ya Polisi ya Mukarange ndetse n’ibyo bikoresho yibye bikaba ariho biri.

Ikindi gikorwa nk’iki kikaba cyarabereye mu karere ka Kamonyi, aho Polisi yafashe uwitwa Niyonizeye Olivier w’imyaka 27 y’amavuko imusanganye ibiro 10 by’urumogi, ubw akaba afungiye kuri Polisi sitasiyo ya Mugina.

Umuyobozi wa  Polisi mu karere ka Kamonyi Senior Superintendent (SSP) Francis Muheto yavuze ko uyu mukwabu wateguwe mu rwego rwo kurwanya ibiyobyabwenge muri ako Karere ,. Yongeyeho ko uwo mukwabu uzakomeza akaba ashimira abaturage uburyo bafatanya na Polisi mu kuyiha amakuru hagamijwe  kurwanya no gukumira ibyaha.

Na none mu Karere ka Nyarugenge, umurenge wa Muhima hakozwe umukwabu  hafatirwamo abacuruza mu muhanda bazwi kw’izina ry’abazunguzajyi 18, abasabiriza mu mihanda 16 ndetse  hanafatwa  n’abantu bakekwaho ubujura 20.

Umuyobozi wa Polisi mu karere ka Nyarugenge Chief superintendent (CSP) Dismas Rutaganira yavuze ko uwo mukwabu muri ako karere wari ugamije kugabanya akajagari mu mihanda kubera abacuruza ku buryo butemewe n’amategeko. Yavuze ko  bari bamaze kuba benshi bacururiza mu kajagari  kandi bikabangamira umutekano. CSP Dismas Rutaganira yongeyeho ko  bamwe mu bacururiza muri ako kajagari babyihisha inyuma bagacuruza n’ibiyobyabwenge ndetse bakaba bakora n’ubugizi bwa  nabi.

Naho ku ruhande rw’abasabiriza, umuyobozi wa polisi mu karere ka Nyarugenge  yavuze ko gusabiriza  ari umuco mubi, yongeyeho  ko n’amategeko abihanira, akaba ariyo mpamvu nabo babafashe kugira ngo bagabanye ako kajagari k’abantu basabiriza mu mujyi.

Abafashwe bakekwaho ubujura, bo bafashwe hakurikijwe amakuru yatanzwe n’abaturage aho babwiye Polisi ko  mu nkengero z’umugezi wa Nyabugogo ndetse no kuri ya matara yaka ibara ry’umutuku bakunze kwita feux  ko  hari urubyiruko rwambura abantu,rugahita rujya kwihisha shora ku nkengero z’umugezi wa Nyabugogo nyuma yo gucuza abantu utwabo.

Akaba yashimye abaturage uburyo batanga amakuru ku gihe akomeza abasaba kutadohoka  gutanga amakuru kuri Polisi  aho bakeka hose hari abagizi ba nabi ndetse n’abanyabyaha batandukanye.


<-Back To RNP News