Kuri uyu wa gatandatu taliki ya 4 Mutarama 2014, Polisi y’u Rwanda yataye muri yombi abantu babiri  bakaba bakekwaho gukoresha amafaranga y’amahimbano,  bombi bakaba bafatiwe mu turere twa Gasabo na Gakenke.
 
Uwo muri Gasabo yafashwe yishyura ayo mafaranga ubwo yaguraga ikarita yo guhamagara. Umucuruzi yayishyuye niwe wakemanze ayo mafaranga  maze abimenyesha Polisi nayo ihita umuta muri yombi ubu akaba afungiye muri sitasiyo ya Polisi ya Remera.
 
Uwo muri Gakenke  yafashwe arimo kugura ibintu mu iduka akoresha amafaranga y’amahimbano, nyuma y’uko  nyir’iduka atamushize amakenga ku mafaranga yari afite. Uyu nyir’iduka afatanyije n’abaturage bari aho  bahise bitabaza Polisi ihita imufata, ubu iperereza rikaba rikomeje ngo ukuri kujye ahagaragara ku byerekeranye n’inkomoko y’ayo mafaranga y’amiganano, ubu akaba afungiye kuri sitasiyo ya Polisi ya Rushashi.
 
Kuri ibi byaha, Umuvugizi wa Polisi mu  Mujyi wa Kigali, Senior Superintendent  Urbain Mwiseneza  akaba asaba abantu kutijandika muri ibi bikorwa byo gukora amafaranga no kuyigana ngo aha barashaka gukira ntacyo bashoye  ndetse bakitandukanya n’ibindi byaha birebana n’ubukungu n’imari by’igihugu.
 
Arasaba kandi abaturage kujya batanga amakuru y’abantu hirya no hino bashobora kugaragara mu bikorwa byo kwigana amafaranga ndetse n’ibindi byaha muri rusange kugira ngo habeho kwirinda ibihombo by’abaturage b’inzirakarengane no  kurengera ubukungu bw’igihugu no gucunga umutekano w’abaturarwanda.
 
Yarangije yibutsa kandi ko icyaha nk’iki iyo gihamye uwagikoze ahanwa n’amategeko y’u Rwanda  nk’uko bikubiye mu gitabo cy’amategeko ahana ibyaha mu Rwanda.