Kinyarwanda
English
Mu gihe habura igihe gito ngo shampiyona y'umupira w'amaguru mu Rwanda mu cyiciro cya mbere itangire, Polisi y'u Rwanda yatangiye gutegura abakinnyi bayo.
Iyi myiteguro yatangiye hasuzumwa abakinnyi b'ikipe ya Police FC (ikina mu cyiciro cya Mbere) na Interfoce FC, ikipe y'abato ikina mu cyiciro cya Kabiri.
Usibye abakinnyi, hanasuzumwe abatoza babo n'abandi bantu b'ingenzi bahora hafi y'aya makipe. Ni igikorwa cyabaye kuri uyu wa Gatanu tariki ya 23 Ukwakira, kibera ku Cyicaro gikuru cya Polisi y'u Rwanda ku Kacyiru.
Abakinnyi basuzumwe bose hamwe bari 42 ba Police FC n'abatoza babo ndetse n'abandi bakinnyi 32 b'ikipe ya Interforce FC.
Umunyamabanga mukuru wa Police FC akaba n'umuvugizi w'iyi kipe, Chief Inspector of Police (CIP) Maurice Karangwa yavuze ko gusuzuma abakinnyi,abatoza ndetse n'abandi bantu baba hafi y'ikipe ari ngombwa mbere y'uko bajya mu mwiherero kwitegura shampiyona.
Yagize ati "Ni ngombwa gusuzumwa COVID-19, nitumara kubona ibisubizo byose abakinnyi bose ndetse n'abatoza babo n'abandi bantu b'ingenzi bazajya mu mwiherero aho ikipe izaba iri mu myitozo. Ariko nanone tuzakomeza kubahiriza amabwiriza y'isuku n'andi ajyanye no kwirinda ikwirakwira rya COVID-19."
CIP Karangwa yakomeje avuga ko gukaraba mu ntoki n'amazi meza n'isabune ndetse no gukoresha imiti yica udukoko bizakomeza kubahirizwa haba mbere na nyuma y'imyitozo cyangwa umukino. Abantu bazakomeza kwambara agapfukamunwa ndetse hanubahirizwe intera hagati y'umuntu n'undi.
Yakomeje avuga ko ibikoresho nk 'amamodoka, imipira yo gukina n'ibindi bikoresho bizajya biterwa imiti yica agakoko COVID-19 mu masaha 72 mbere y'umukino utangira.
