POLISI Y'U RWANDA

Ikipe ya Polisi y'u Rwanda y'umukino w'intoki (Police Handball Club) yegukanye igikombe cya Beach Handball 2017 y’abagabo (umukino ukinirwa ku mucanga).

Iri rushanwa ryabereye ku nkengero z’Ikiyaga cya Kivu mu karere ka Rubavu ku wa gatandatu tariki 14 Ukwakira uyu mwaka.

Usibye Police Handball Club, andi makipe  yaryitabiriye ni Stella Maris na  The Winners.

Police Handball Club yatsinze imikino yose yakinnye n’aya makipe yombi yo muri Rubavu.

Yatsinze Stella Marris iyitwaye amanota 2 agenewe umukino; ndetse ni ko byagenze no kuri The Winners.

Iki ni igikombe cya 37 Police Handball Club itwaye mu marushanwa atandukanye yitabiriye kuva ishyizweho mu 2000; kikaba ari icya 3 itwaye gikinirwa ku mucanga dore ko buri gihe iyo yitabiriye aya marushanwa itwara  ibikombe.

Ibikombe bikinirwa ku mucanga Police Handball Club yitabiriye ni ibyo mu mwaka wa 2014, 2015 n'iki cya 2017.

Mu kiganiro n’Umutoza wayo, Assistant Inspector of Police (AIP) Antoine Ntabanganyimana yagize ati," Abakinnyi bacu ni abo gushimirwa ubwitange n'umurava bagaragaje muri iri rushanwa ndetse n’andi yaribanjirije. Turashima kandi Ubuyobozi bukuru bwa Polisi y'u Rwanda budahwema gutera inkunga iyi kipe kugira ngo ikomeze gutera imbere."

Yakomoje ku gituma ikipe abereye Umutoza  itwara ibikombe byinshi agira ati,"Buri gihe intsinzi tuyikesha imyitozo ihagije, kwitwara neza kw’abakinnyi bubahiriza amabwiriza; kandi bagakina bafite ishyaka n’intego byo gutsinda. Tuyikesha kandi kuba Ubuyobozi bukuru bwa Polisi butuba hafi."

AIP Ntabanganyimana yongeyeho ko kuba batwaye iki gikombe bibahaye imbaraga zo kwitegura neza Shampiyona y'umwaka utaha; kandi ko bafite icyizere ko bazayitwaramo neza.

Yaboneyeho gushimira abafana ba Police Handball Club uburyo bayiba hafi; kandi abizeza ko itazabatetereza.