POLISI Y'U RWANDA

Polisi y’u Rwanda ikomeje ubukangurambaga bwa ‘Gerayo Amahoro’ hirya no hino mu gihugu, bugamije kwimakaza umutekano wo mu muhanda, aho abawukoresha bashishikarizwa kwirinda amakosa ateza impanuka.

Kuri uyu wa Kabiri tariki 9 Mutarama, abapolisi bagejeje ubutumwa ku bakoresha umuhanda bagera ku 1820 bo mu turere twa Ngoma na Kirehe mu Ntara y’Iburasirazuba no mu Karere ka Karongi mu Ntara y’Iburengerazuba, bubibutsa amwe mu makosa bagomba kwirinda kugira ngo barusheho gusigasira umutekano wo mu muhanda birinda impanuka n’inkurikizi zazo.

Mu bigishijwe harimo abanyamaguru, abanyeshuri, abatwara amagare, abatwara moto ndetse n’abashoferi bari bahurijwe hamwe ku mihanda itandukanye yo muri utwo turere.

Bibukijwe ibyo basabwa birimo kubahiriza imirongo iranga ahagenewe kwambukira abanyamaguru (Zebra Crossing) no kutarangarira kuri telefone mu gihe bambukiranya umuhanda ku banyamaguru no kwirinda kugendera ku muvuduko ukabije cyangwa gutwara banyoye ibisindisha ku batwara ibinyabiziga.

IBYO ABAKORESHA UMUHANDA BASABWA

ABANYAMAGURU

Umunyamaguru agomba kugendera mu gice cy'ibumoso bw'umuhanda aho ibinyabiziga biza bimuturuka imbere abireba.

Kwambukira mu mirongo yagenewe abanyamaguru, nyuma yo kwitegereza iburyo n’ibumoso ko nta kinyabiziga kiri hafi ye, akambuka yihuta ariko atiruka.

Kwirinda kwambuka uvugira kuri telefone cyangwa wambaye utwumvisho two mu matwi (écouteurs).  

UMUSHOFERI

Irinde kuvugira kuri telefone igihe utwaye ikinyabiziga

Irinde gutwara ikinyabiziga wanyweye ibisindisha

Irinde kurenza umuvuduko wagenwe

Irinde gukubaganya akagabanyamuvuduko 

Ambara umukandara w’imodoka buri gihe 

Ubahiriza uburenganzira bw’abanyamaguru

Kirazira gutwara ikinyabiziga utabifitiye uruhushya

Suzumisha ikinyabiziga cyawe mu gihe cyagenwe

Kirazira gutwara ikinyabiziga kidafitiwe ubwishingizi

Kirazira gutwara abarenze/ibirenze ubushobozi bw’ikinyabiziga

Mbere yo gutwara ikinyabiziga, suzuma niba ibyangombwa bisabwa byuzuye

Irinde kugendera mu gisate cy’ibumoso bw’umuhanda

Kirazira guparika ahatabugenewe

ABATWARA MOTO

Irinde gutwara moto wanyweye ibisindisha

Irinde kujya kuri moto utambaye kasike kandi uyambike n’umugenzi

Gendera ku muvuduko wagenwe

Irinde kugenda usesera mu bindi binyabiziga

Irinde gukoresha telefoni mu gihe utwaye

Ubahiriza uburenganzira bw’abanyamaguru

Irinde guhindura ibirango bigize ikinyabiziga cyawe

Irinde guparika ahatabugenewe

ABATWARA AMAGARE

Irinde gufata ku binyabiziga cyane cyane amakamyo

Irinde gutwara nyuma ya saa Kumi n’ebyiri z’umugoroba (18H00)

Kirazira kugendera mu muhanda hagati

Kirazira kutubahiriza inzira z’abanyamaguru

Kirazira gutwara ibintu birenze ubushobozi bw’igare

 ABAGENZI

Mugenzi gira inama umushoferi/umumotari/umunyonzi ugutwaye kubahiriza amategeko y’umuhanda kugira ngo mubashe kugera iyo mujya amahoro

Mu gihe wicaye mu modoka, ambara umukandara, mu gihe uri kuri moto nabwo wibuke kwambara Kasike.